Шундый инде мин.
Шаблоннар дөньясын танымыйм.
Кысаларга сыймыйм. Чикләрне җимерәм.
Тик үзем теләсәм (гаҗәпме?) – буйсынам,
Тәртәгә керәм дә, иркенләп җигеләм.

Шундый инде мин.
Дөреслек табам дип мең тапкыр үзгәргән.
Сындырып ялгауга, ялганга түзмәгән.
Тик һаман күңелдә исерткеч ихласлык,
Дөньясын гаепләп тормыштан бизмәгән.

Шундый инде мин.
Сагышым да тирән. Кайвакыт ялгызым
Чукраклар, сукырлар илендә тилмерәм.
Үткәннәрне какмыйм. Алдагысын бакмыйм.
Бушанам да төнгә, таңнарга үреләм.
А.Г. 15.07.2021

#ничекбаршулай
Шундый инде мин. Кәнфит тә, бүләк тә түгел!
Танышкан мәлдә кешегә каш җимереп карап тормыйсың бит инде, матур итеп елмаясың, сабыр гына тыңлап торасың, әдәп саклыйсың. Банкта эшләгәндә бер җитәкчем (хатын-кыз иде) белән очрашудан кайтып барабыз, икебезнең дә кулда документлар, әмма аның ике кулы да буш түгел, мин ничектер җайлырак тоттыммы, ишекне ачарга кулым бушады. Үрелеп ачтым инде. Сүзләре әле дә колагымда чыңлап тора: "Ялагайланма!" – диде. Аның урынында бер белмәгән чит кеше булса да ишекне ачып бирәсемне аңлатып тормадым әлбәттә. Искә төшкәShow moreн саен елмаеп куям. Шулай да була.
Бер туганым гел "артык тәтиләнәсең, өздереп, каты итеп әйтергә кирәк, конкрет сөйләшергә өйрән" дип тәкърарлый иде. Берәр гади генә яхшылык эшләсәң дә, изге булып кыланма, ачуны китерәсең, дип хәлләрне алды бәгырь. Соң, "сез дигәндә, аяк идәндә!" Хәзер нигә үпкәләп йөридер, әллә җитәрлек итеп каты әйтә белмәгәнмен, әллә киресенчә... үпкәләтәсем дә килмәгән иде югыйсә. Ни генә дисәң дә, туганым, үз кеше.
Һәркемнең эчендә шайтаны да, фәрештәсе дә бардыр. Кемне уятасың бит... Сүз дә юк, гаҗәеп сабыр, гаҗәеп ипле кешеләр була. Җәйге таң нуры кебек якты, җылы кешеләр... Аларның янәшәләрендә кадерләрен белерлек яхшы туганнары, ышанычлы дуслары, кешелекле адәмнәр күбрәк булсын иде дип теләп каласың... Яз көне күңел аеруча җылыга, яктыга тартыла. #ничекбаршулай

Хат язам...
Барырмы, юктырмы... (билгесез)...
Соңарган яңа ел хатлары...
Шулай да бер ният бар иде.
Бар иде сүз биргән чакларым.
“Язармын, һичшиксез язармын”, –
Диебрәк ышаныч яуланган.
Минме соң сүз биргән ялганчы?!
Минме соң ышанып алданган?!

Хат язам...
Сүз башы хәл белеш:
Сез ничек? Ни хәлдә? Бер көйме?
Ел башы хәвефсез булдымы,
Яңа ел өметле килдеме?
Саулыклар, тазалык ничек соң?
Мал-туар? Балалар? Күршеләр?
Элегрәк йөрешкән күк хәзер
Бер-берен барлыймы кешеләр?
Авылда ничә йорт, ныклармы?
Яшьләр дә яшәргә каламы?
Шәһәргә йөрисезме чыгып?
Күрдегезме килеп каланы?

Мин сорау бирергә яратам,
Аннары җавабын тыңларга.
Яратам сөйләшеп алырга һәм
Шулайрак хатлар язарга. Show more
Бездә дә тормышлар тик тормый.
Таң ата, кич була – көн уза.
Кемнәрдер, кемнедер яманлый,
Кемнәрдер сату дип пыр туза.
Акча дип чабучылар байтак.
Саулыкка тилмергән аз түгел.
Миһербанлы ихлас кешене
Тансыклый, сагына гел күңел.
Бар алар, фидакяр затлар да,
Юмартлар, тырышлар җитәрлек.
Булдыксыз берәүне зурлауга,
Мактауга исләрең китәрлек.
Бәяләр?! Уңдырышлы җирдә
Котырып алынган чүп кебек.
Ул бәя үсүен туктатыр бер көч тә,
Ашлама, хәйлә дә юк кебек.

Шәһәрдә тормышның үз яме,
Үз тәме бар дисәм, көлмәгез.
“Авылдан киткән дә, сатылган,
Кыйбласын югалткан”, – димәгез.
Каланың үз көе дисәм дә, ул һаман
Авылның моңына тоташа.
Килешәм, монда җил кырысрак,
Уеннар гаделсез һәм башка тамаша.
Ә гади кешегә шәһәр ни, авылны ни,
Барыбер җигелеп эшлисе.
Никадәр хыялый булсаң да
Күкләрдән өзелеп төшми шул.
Ә гади кешегә кайда да матурлык!
Уйларың саф булса, аклыгы табыла.
Күңел нуры җылы, якты булса
Көзгесен таба ул, кояштай чагыла.

Аралашыйк әйдә, хәбәрләшеп яшик,
Яңалык, сөенеч бүлешик.
Изге теләк теләп, матур сүз сөйләшеп
Дөньяга җылылык өләшик...
#ничекбаршулай
Бер сулышта язылган хат иде бу... Хәзер хатлар алышмыйбыз шул, смслар, сообщениелар язышабыз, әлү-әлү дияргә дә гел вакыт (кемдәдер теләк тә) җитеп бетми әле, какуй хат язу )))

Мин яхшы укучы,
Син шикләнмә!
Сабагыңны кыю бирә тор:
Якын итеп, җылы сүзгә алдап,
Хәйлә-тозагыңны иркен кор.
Мин яхшы укучы.
Тиз өйрәнәм
Аерырга акны карадан.
Ышанычым гына бер югалса,
Кайта белми никтер яңадан.
Мин яхшы укучы –
Шунда бәла,
Казасы да, җәзасы да шул!
Үз тозагыңа тарымыйм дисәң,
Син зирәгрәк, бераз саграк бул.
А.Г. 2019 елда язылган монысы да ))) #ничекбаршулай
Ул елны шактый язылган икән дип укып утыруым... башлап ташлаганы тагын да күбрәк ))) #хыялыйдисезинде #яхшыукучы гына югыйсә )))